திருப்போரூர் சிதம்பர சுவாமிகள்
அருளிய
மதுரை மீனாட்சியம்மை
கலிவெண்பா
காப்பு
அங்கயற்கும் மாற்கு மரியபெரு மானிடஞ்சே
ரங்கயற்க ணம்மைக் கணியவே - வங்கயத்தின்
மாமுகங்கொள் கோமானை வாழ்த்திக்
கலிவெண்பா
நாமுகந்து பாடுவோம் நன்கு.
நூல்
சீராரு பூங்கமலத் தெள்ளமுதே சேயிழையே
காராரும் மேனிக் கருங்குயிலே -
ஆராயும்
(1)
வேத முதலாகி நின்றமெய்ப்பொருளே
மின்னொளியே
ஆதி பராபரையே அம்பிகையே - சோதியே
(2)
அண்டரெல்லாம் போற்று மரும்பொருளே
வாரணங்கே
எண்திசைக்கும் தாயான யீசுவரியே
– தெண்திரையில்
(3)
வந்தமுதே என்று மாறாமலே நினைப்பார்
சிந்தைதனிலே உறையும் செல்வியே
- அந்தமிலா
(4)
மாயோன் தனக்கிளைய வல்லியே மாமயிலோன்
தாயே பராபரையே சங்கரியே - தூயவொளி
(5)
மன்னுங் கயிலாச மாமயிலே மேருவெனு
பொன்னங் கிரியுடைய பூங்கொடியே
- அன்னமே
(6)
அட்டகுல வெற்பா யமர்ந்தவளே யாதியந்த
மெட்டெட்டுந் தானா யிருந்தவளே
- முட்டவெங்கும்
(7)
அவ்வெழுத்தாய் நின்ற வரும்பொருளே வாரணங்கே
உவ்வெழுத்தாய் நின்றதோர் உண்மையே
- எவ்வெழுத்தும்
(8)
தானாகி நின்றதொரு தற்பரையே எவ்வுயிர்க்கும்
ஊனாகி நின்றதோர் உத்தமியே - கோனாய்ப்
(9)
படிஅளக்க மால்பார் பதினான்கும்
ஒக்க
அடியவரை ஈடேற்றும் அன்னாய் - முடிவிலா
(10)
ஓங்காரத்து உட்பொருளே உற்ற நவகோணத்தில்
ரீங்காரம் தன்னில் இருப்பவளே -
பாங்கான
(11)
முக்கோணத்துள் இருக்கும் மூர்த்தியே
மூவிரண்டாம்
சட்கோணத்துள் இருக்கும் சத்தியே
- மிக்கபுகழ்
(12)
எண்ணிரண்டாம் கோட்டில் இருப்பவளே
எவ்வுயிர்க்கும்
பண்ணிசைந்த பாட்டின்பழம்பொருளே
- விண்ணுலகின்
(13)
மேற்பட்டு அங்கு ஊடுருவி மேலாகி
நின்றதொரு
நாற்பத்து முக்கோண நாயகியே - சீர்ப்பெற்ற
(14)
பஞ்சகோணத்து இருந்த பைங்கிளியே
பார்முழுதும்
தஞ்சம் அதுவாகி நின்ற தையலே - செஞ்சொல்
மறைச்
(15)
சொல்லே பொருளே சுவையே அறுசுவையே
எல்லாப் புவிக்கும் இறைவியே - தொல்லை
(16)
எறும்புகடை யானைதலை எண்ணில் உயிர்க்கும்
உறும்பொருளாய் அங்கங்கு உணர்வாய்ப்
– பெரும்பயனாய்
(17)
ஆறாறு தத்துவமாய் ஐயிரண்டு வாயுவாய்க்
கூறாய்த் திசைபத்தின் கூட்டமாய்ப்
- பேறான
(18)
அஞ்செழுத்தாய் எட்டெழுத்தாய் ஐம்பத்தோர்
அக்கரமாய்ப்
பஞ்சவர்ணமாய்ப் பஞ்ச தேவதையாய்
- வஞ்சமற்ற
(19)
ஆறாதா ரப்பொருளாய் ஐயைந்தாய் ஐம்மூன்றாய்
வீறான சக்கரத்தின் மின்னொளியாய்க்
- கூறாங்
(20)
கருவிகர ணாதிகளாய்க் கைகலந்து நின்ற
பெரியதொரு மாயைப் பிரிவாய் - உரியதொரு
(21)
சோத்திரத்தில் சத்தமாய்த் தொக்கில்
பரிசமாய்
நேத்திரத்தில் பேருருவாய் நீக்கமிலா
- நாத்தலனின்
(22)
மெத்திரதமாய் மூக்கின் மேவுகந்த
மாய்ப் பிறவாய்
மத்த பிரமத்த வயிரவியாய்ச் - சுத்த
(23)
துரியமதாய்ப் பின்னும் துரியா தீதத்தின்
அரிய சிலம்பொலியும் ஆர்ப்பத் -
தெரிவரிதாய்
(24)
நாடுதனில் சென்றிரந்து நற்பவுரி
கொண்டுதொந்தம்
ஆடுகின்ற பார்ப்பதியே அம்பிகையே
- நாடிக்
(25)
களங்கமறவே தான் கரும்புருவம் தன்னில்
பளிங்கொளியாய் நின்ற பரமே - வளம்பெறவே
(26)
கண்ணிரண்டின் உள்ளே கருணைத் திருவடிவாய்ப்
புண்ணியமாய் நின்றருளும் பூவையே
- பண்ணமைந்த
(27)
நாசி நுனிமேல் நடுவெழுந்த தீபமாய்
ஓசைவிந்து நாதாந்தத்து உட்பொருளாய்
- நேசமுடன்
(28)
அஞ்சு முகமாய் அகண்டபரி பூரணமாய்ப்
பஞ்சபூதம் ஆன பைங்கிளியே - கஞ்சமலர்ப்
(29)
பாதம் இரண்டாகிப் பச்சைநிறம் தானாகி
ஆதிமுதலாகி நின்ற அம்பரமே - தீதிலா
(30)
நெற்றிதனில் கண்ணாகி நிட்கள ரூபப்
பொருளாய்
உற்ற வெளியாகி நின்ற உத்தமியே
- பத்திநிரை
(31)
ஆகாயத்தின் ஒளியாய் அந்தரத்தின்
ரூபமாய்
மேகாதிக்குள்ளே விளைபொருளாய் -
வாகாம்
(32)
இடைபிங் கலையாய் இரண்டுக்கும் எட்டாக்
கடையும் சுழுமுனையாய்க் காலாய்
- மடலவிழ்ந்த
(33)
மூலாதாரத்து ஒளியாய் மும்மண்டலம்
கடந்து
மேலாதாரத்து இருந்த வெண்மதியாய்ப்
- பாலூறல்
(34)
உண்ணும் சிவயோக உத்தமியே மெய்த்தவமே
பண்ணுமறைவேதப் பழம் பொருளே - எண்ணரிய
(35)
மெய்ஞ்ஞான வித்தே விளக்கொளியே மெய்ச்சுடரே
அஞ்ஞானமே அகற்றும் அம்மையே - பைந்நாகம்
(36)
பூண்ட சிவனாரிடத்துப் பூங்கொடியே
பாங்குடனே
தாண்டவமாடப் பவுரி தாளமொத்தி -
ஆண்டியுடன்
(37)
ஆடுங்கூத்தாடிச்சி அம்மனை பந்தாடிச்சி
தேடியும் மால் காணாச் சிவசக்தி
- நாடியுனைப்
(38)
போற்றும் அடியார்கள் வினை போக்கியே
அஞ்சல் என்று
தோற்றுகின்ற அம்மை துடியிடைச்சி
- ஏத்தரிய
(39)
பச்சை நிறத்தி பவளக் கொடியிடைச்சி
கச்சைப் பொருமுலைச்சி கைவளைச்சி
- கொச்சை
(40)
மலையரையன் பெற்ற மலைச்சி கலைச்சி
நிலையறி வேதாந்த நிலைச்சி - அலையாத
(41)
அன்ன நடைச்சி அருமறைச்சி ஆண்டிச்சி
கன்னல் மொழிச்சி கருணைச்சி - பன்னுதமிழ்
(42)
வாய்ச்சி சடைச்சி வடிவுடைய மங்கைச்சி
பேய்ச்சி இளமுலைச்சி பேதைச்சி
- காய்ச்சியபால்
(43)
வெண்ணெய் மொழிச்சி வெளிச்சி வெளியிடைச்சி
அண்ணுபுரம் தீயிட்ட அம்படைச்சி
- நண்ணல் அரும்
(44)
கொப்புக் குழைச்சி குவளைப் பெருவிழிச்சி
அப்புச் சடைச்சி சிவகாமச்சி - மெய்ப்பாம்
(45)
கருப்புச் சிலைச்சி கலைச்சி வலைச்சி
மருப்புத் தனத்தி மவுனத்தி - பொருப்பிடத்தி
(46)
தாமப் புயத்தி சமர்த்தி தருமத்தி
நாமச் சிவபுரத்தி நாரணத்தி - தேமருவும்
(47)
காரணத்தி பூத கணத்தி தனபார
வாரணத்தி அட்டத்திக்கும் ஆரணத்தி
- பூரணத்தி
(48)
பாதப் பரிபுரத்தி பங்கயத்தி செங்கரத்தி
சோதி மணிநிறத்தி சொப்பனத்தி - பாதிமதி
(49)
சூடுகின்ற சொக்கருடன் துய்யபுலித்
தோலுடுத்திக்
காடுதனில் வீற்றிருக்கும் காரணியே
- நாடறியும்
(50)
சேணிச்சி நல்ல சிறுத்தொண்டன் பிள்ளையறுத்
தூணிச்சி நஞ்சமுதாம் ஊணிச்சி -
பாணிச்சி
(51)
பாசாங்கு சத்தி பரத்தி பருப்பதத்தி
காசாம்பூ மேனிக் கனதனத்தி - மாசிலா
(52)
அம்பரத்தி ஐம்புலத்தி ஆனதொரு வேதாந்த
உம்பருக்கும் எட்டாத உத்தமத்தி
– செம்பொன்வளைச்
(53)
செட்டிச்சி வையைதனில் சென்றுவெட்டி
மண்சுமந்த
ஒட்டச்சி பூதியணி உத்தளத்தி - அட்டதிக்கு
(54)
மின்னே விளக்கே விலையில்லாச் சீவரத்னப்
பொன்னே நவமணியே பூங்கிளியே - இன்னமுதே
(55)
மாணிக்க வல்லியே மாமரக தப்பணியே
ஆணிக் கனகத் தரும்பொருளே - மாணுற்ற
(56)
சிங்கார வல்லியே! செம்பொன் சிலை
வளைத்த
கங்காளற்கு அன்பான கண்மணியே - மங்காத
(57)
தெய்வக் குலக்கொழுந்தே செம்பட்டுடைத்
திருவே
ஐவருக்கும் தாயாய் அமர்ந்தவளே
- மெய்யருக்குச்
(58)
சித்தி கொடுக்கும் சிவானந்தி அன்பருக்கு
முத்திகொடுக்கும் ஞான மூர்த்தியே
- எத்திசைக்கும்
(59)
தாயகமாய்ச் சூழ்தாவர சங்கமம் விளக்கும்
தூயசுடர் மூன்றான சூக்குமமே - வேய்
ஈன்ற
(60)
நித்திலமே கற்பகமே நின்மலமே நன்மணியே
சுத்த பரிபூரணியே சுந்தரியே - அத்தருடன்
(61)
வாதாடு மங்கையே மாமந்த்ர ரூபியே
வேதாந்தியே கமல மெல்லியலே - நாதாந்த
(62)
மாயே சுவரியே மங்கையே மாமறைக்கும்
தாயாகி நின்ற சரசுவதியே - காயாய்ப்
(63)
பழுத்த பழமாய்ப் பழத்திரதம் தானாய்
முழுத்த பரானந்த முதலாய் - எழுத்துமுதல்
(64)
ஆறுசம யங்களுக்குள் அவ்வவர்க்கும்
வெவ்வேறாய்
வேறுபல ரூப விகற்பமதாய்க் - கூறரிதாய்
(65)
அங்கங்கும் தானாய் அமர்ந்தவளே ஆதிஅந்தம்
எங்கெங்கும் தானாய் இருந்தவளே
- திங்கள்நுதல்
(66)
அஞ்சுகமே தேனே அணங்கே அமுதமொழிக்
கிஞ்சுகமே பிஞ்சுமதிக் கிள்ளையே
- கொஞ்சுகுயில்
(67)
கன்னி திரிசூலி காபாலி சிவகாமி
மன்னு கவுரி மகமாயி - பொன்னின்மலர்த்
(68)
தாளி சதுரி சவுந்தரி முக்கண்ணுடைய
காளி பகவதி கங்காளி - தூளியாத்
(69)
தக்கன் தலையறுத்த தத்துவத்தி தற்பரத்தி
அக்கினி கை ஈர்ந்த அமர்க்களத்தி
- மிக்கபுகழ்
(70)
வீரசத்தி மேருவினை வில்லா வளைத்தஒரு
பாரசத்தி வேதப் பரதசத்தி - தாரணிகள்
(71)
கொண்ட கார் இச்சிக்கும் குந்தளத்தி
மாமதனன்
சண்டைகாரிச்சி சகலத்தி - துண்டமதிச்
(72)
செஞ்சடைச்சி கஞ்சுளிச்சி செம்படத்தி
கங்கணத்தி
பஞ்சசத்தி கொந்தளத்தி பைம்பணத்தி
– அஞ்சனத்தி
(73)
முத்துவடக் கொங்கைச்சி முல்லை முகிழ்நகைச்சி
பத்தரவர் நெஞ்சகத்தி பாரிடத்தி
- சுத்தவெள்ளை
(74)
அக்கு வடத்தி அறம்வளர்த்தி அன்புடைச்சி
செக்கர் இளம்பிறைச்சி செண்பகத்தி
- தக்கமணி
(75)
ஓலைக் குழைச்சி உபதேச குண்டலச்சி
மாலைக் கழுத்தி மவுனத்தி - ஞாலமெல்லாம்
(76)
அக்கரத்தி பொக்கணத்தி அண்டபகி ரண்டத்தி
முக்கணத்தி நிட்களத்தி மோட்சத்தி
- மிக்கபுகழ்
(77)
ஏகாக் கரத்தி இமயப் பருப்பதத்தி
நாகாதி பூண்டசிங்க நாதத்தி - வாகான
(78)
பத்மா சனத்தி பரிமளத்தி பாம்பணைத்தி
கற்பாந் தரத்தி கருநிறத்தி - விற்காம
(79)
வேடிச்சி நல்லதொரு மீனவனுக்கு அன்றுமுடி
சூடிச்சி கொக்கு இறகு சூடிச்சி
- நாடிச்சீர்
(80)
பாதம் தனைத்தேடும் பங்கயத்தில்
வீற்றிருக்கும்
வேதன் தலையறுத்த வித்தகத்தி - நீதிபுனை
(81)
பாடகத்தி கீதப்ர பந்தத்தி வெள்ளிமன்றுள்
ஆடகத்தி கூடலுக்குள் ஆதியே - ஏடெதிரே
(82)
ஏற்றுவித்து முன்சமணர் எண்ணாயிரர்
கழுவில்
வீற்றிருக்க வைத்தமறை வித்தகியே
– நாற்றிசையும்
(83)
கொண்டாடப் பெற்றதொரு கோமளமே யாமளையே
தண்டாமரைத் திருவே தையலே - மண்டலங்கள்
(84)
எங்குமொத்து நின்றருளும் ஈசுவரியே
மாமதுரை
அங்கயற்கண் நாயகியே அம்மையே - துங்க
(85)
ஒளியே பெருந்திருவே ஓதிமமே உண்மை
வெளியே பரப்பிரம வித்தே - அளிசேரும்
(86)
கொந்தளக பந்திக் குயிலே சிவயோகத்து
ஐந்தருவே மூவருக்கும் அன்னையே
- எந்தம்இடர்
(87)
அல்லல் வினை எல்லாம் அகற்றியே அஞ்சல்
என்று
நல்ல சவுபாக்கியத்தை நல்கியே -
வல்லபத்தின்
(88)
ஆசு மதுரம் சித்ர வித்தாரம் என்று
அறிஞர்
பேசுகின்ற உண்மைப் பெருவாக்கும்
- நேசமுடன்
(89)
தந்து என்னை ஆட்கொண்டு சற்குருவாய்
என்னகத்தில்
வந்திருந்து புத்தி மதிகொடுத்துச்
- சந்ததமும்
(90)
நீயே துணையாகி நின்று இரட்சி அங்கயற்கண்
தாயே சரணம் சரண்.
(91)
கருத்துகள் இல்லை:
கருத்துரையிடுக